菊梓乔(Hana)日前为TVB娱乐新闻台节目《StarTalk》任嘉宾,接受主播许文轩(Edmond)专访,大谈推出新歌《随意瞒》感受。她说:“一见到歌词,使唔使咁度身订造?句句都好似经历自己每段嘅感情咁。通常都觉得被骗系受害者,但其实自己有得拣离开,就系因为自己唔舍得,连自己都呃埋自己,骗自己先至最痛。(有边次被伤害得好深?) 有一次嘅经历好恐怖,佢每逢大时大节都话要开工,但我相信佢,冇Check佢,连电话都唔睇,点知拍拖几年之后,先至发现佢原来一直都有个女朋友,佢讲大话我完全发觉唔到,佢不停做戏我都唔知,自己无啦啦被成为第三者,因为真系接受唔到所以离开。(有冇吓怕咗?所以未到最后一刻都唔公开?) 因为太多变数,自己亦都唔锺意用呢啲嘢去做新闻,所以我平时都好少提及私人事,如果真系有一个长久、稳定,我系会同大家分享。”
谈到近年Hana派歌数量比早年少,她说:“依家可以慢慢去制作每首歌,好似生BB咁,一次过生十个同生两个,点都有份别。(嚟紧出歌计划会点?)依家冇得计划,因为太多不确定,我上年计划嘅嘢,冇一样嘢跟到。疫情令到连出街同正常沟通都唔得,所以有时谂得太多都会失望,我唔想令自己咁大压力。疫情下,之前有段时间比较悲观,好抑鬱,一起身喺度喊,坐喺度乜都唔想做,又唔敢睇返以前自己啲嘢。依家学识同自己讲要由头开始,归零,慢慢个人就会比较舒服。疫情下自己狂清洁屋企、洗碗同执嘢,好似断舍离咁,有时去埋朋友屋企清洁,原来咁样自己会觉得好舒服,有一个治疗作用。”